​HEPI, Rangiteaorere Rankinson (Matua)

30/10/1980 – 14/09/2026
 
Tamaterangi, e!
Ko wāu kupu ka pāoro nei ki te rangi, ki te whenua 
Kia rere ngā manu tī, kia rere ngā manu tā
Rere ki runga, rere ki raro
Ka pōngia te rangi, ka marū a ngākau
Ka mārū te ngākau ka heke a roimata 
Kāore he manu taki i te kōhanga 
Kua ngaro, kua ngaro, kua riro rā 
 
Tamaterangi, e!
Nāu te kōrero -
He ao te rangi ka uhia
He huruhuru te manu ka rere
Waiho māku e tāpiri
He roimata te mata ka tōkia
He pare kawakawa te rae ka tau
Aue, aue, aue taukuri, e
 
Nei au ka noho i kōnei e tangi atu ana ki te rangi, ki te ao.
Kua kapohia ake nei ko tō mātou taina, a Rangiteaorere Hepi
Kaihāpai i te kaupapa o Te Kōhanga Reo ki roto o Te Wairoa
Wahakī, Kanohi Kitea hoki nō runga i ngā marae o Te Wairoa 
Pouwhakawhirinaki o tōna iwi atawhai, o Ngāi Tamaterangi 
Uri o Mataatua, o Te Arawa, o Tainui me ngā kārangaranga hapū mai i te whitinga o te rā ki tōna tōnga iho ki te uru.
 
Kāore anō te tau ka pau nō te matenga o tō mātou māmā, 
kātahi te pekepoho ka hiki, ka rere, ka aru atu rā.
Ko Rangiteaorere te tuatoru o ngā tamariki a Joseph Hamilton Paerau Hepi rāua ko Georgina Hepi (nee Akuhata-Te Hunua)
Mokopuna a Oki Hepi rāua ko Paretoakai Ormsby; a Mita Singleton Mākiha (Gardiner); a Wiremu Akuhata rāua ko Ngarangikāki Te Hunua.  Hoa piripoho o Rutu.  Tuakana-Taina, Tungāne ki a Pirihira rāua ko Ray; Ropata rāua ko Rose; Kiingi; Moana rāua ko Andre; Lisi rāua ko Nona; Phillip.  Matua Atawhai o Jahkaya, o Mimi, o Blue, me Pepe Taina.  Ankara, Pāpā o te tokomaha.   
 
E mōhiotia ana, ko tōna hiahia tērā kia waihape atu ki te wākāinga
Kāore i te pēnei te tere.  Kāore i te pēnei te haere.
 
Ko ngā whakaritenga ka pēnei i tēnei wā:
Rāhina 14 Hepetema:  Hei te waru i te pō nei ka takihuihui te whānau ki te whare tūpāpāku o Tim Hutchins, ka haria tō mātou taina ki tōna kāinga tuarua, ki te whare o tōna hoa piripoho, tō mātou Cissy a Rutu.  
 
Rātū 15 Hepetema:  Hei te 4 i te atapō, ka hiki i te ara ki runga o Rangiāhua.  Ka peka atu mātou ki te taone o Te Wairoa, kia hipa i tōna kōhanga reo me tōna kāinga, kātahi ka hono mai ko wōna tini hoa-whanaunga, ā, ko te tūmanako ka tatū ki tōna iwi atawhai, a Tamaterangi, i waenga i te 6 me te 7 karaka i te ata.  
 
Ko te whakaritenga o tōna iwi, ka eke ngā ope hei te 9 me te 11 o ngā hāora i te ata; hei te 2 me te 4 hāora i te ahiahi.
Ka riro mā ngā mōrehu o Te Wairoa wōna whakamoemiti e kawe 
 
Rāapa 16 Hepetema:  Ko taua āhua anō rā.
9, 11 i te ata.  2 me te 4 i te ahiahi.
Ka tū tōna pō poroporoākī hei te 7 o taua pō.
 
Rāpare 17 Hepetema:  Hei te atapō, ka kopania tōna waka,
ka whakahokia tōna tinana ki runga i te Rangitaiki, ki Tū Teao.
Ka nehua ki te papa whenua o wōna mātua tīpuna.